Hoxe en día tendemos a crer que os mozos e mozas están máis e mellor informados e preparados para o mundo do que estabamos nós á súa idade. O certo é que, se ben reciben unha enorme cantidade de información a diario sobre tódolos temas e materias, non sempre reciben os mecanismos necesarios para descodificala e asumila.

 Dende a Oficina Municipal de Información Xuvenil (OMIX), sita no Concello, somos conscientes disto e, por iso, ademais de proporcionarlles toda a información que precisen sobre educación, emprego, saúde, oposicións, becas, bolsas de estudio, cursos, premios, concursos, axudas, subvencións, actividades, campamentos, etc., pretendemos ser punto de referencia á hora de entender como poden usar toda esa información e lle poidan sacar así o máximo partido á mesma.

 Ademais de ofrecerlles unha atención personalizada, adecuada a cada un deles, ofrecémoslles gran cantidade de material informativo que de seguro lles axudará a resolver as súas dúbidas e inquietudes. Destacamos, entre outros recursos, o Informe Semanal, a Guía de Información Xuvenil, o Boletín “Xove” de Información e Emprego Xuvenil, diferentes Guías (culturais, turísticas, de albergues…), Revistas e Xornais (de arte, ocio, saúde, emprego, voluntariado, novas tecnoloxías…), folletos e carteis explicativos sobre as diferentes actividades, xornadas, cursos, premios,…, que se celebran en toda a Comunidade, etc. En definitiva, poñemos un sinfín de recursos informativos ao alcance dos nosos mozos e mozas.

 Pretendemos ser tamén ponte entre a mocidade do noso concello, polo que organizamos diferentes actividades e xornadas nas que tod@s poden participar. Así, a través de actividades lúdicas e culturais, axudamos a establecer (e pouco a pouco estreitar) lazos de unión entre todos eles.